सुन्दरपुर आधारभूत विद्यालय का बालबालिकाहरूका लागि दृष्टि परीक्षण तथा अभिभावक अन्तरक्रिया कार्यक्रम सम्पन्न
२६ कार्तिक २०८२, राजेश आचार्य ।
रोटरी क्लब अफ बिर्तामोड मिडटाउनको आयोजनामा र बिर्तामोड आँखा अस्पतालको प्राविधिक सहयोगमा बाह्रदशी गाउँपालिका–३ स्थित सुन्दरपुर आधारभूत विद्यालयका बालबालिकाहरूका लागि दृष्टि परीक्षण तथा अभिभावक अन्तरक्रिया कार्यक्रम सम्पन्न भएको छ ।
विद्यालयका विद्यार्थीहरूमा दृष्टि समस्या पहिचान गर्ने उद्देश्यले कार्यक्रम आयोजना गरिएको क्लबले जनाएको छ। साथै, अभिभावकहरूबीच बालबालिकाको हेरचाह, स्वास्थ्य, अनुशासन र शैक्षिक सुधारबारे खुला अन्तरक्रिया गरिएको थियो।
रोटरी क्लब अफ बिर्तामोड मिडटाउनले समुदायस्तरमा शिक्षा, स्वास्थ्य र सरोकारका क्षेत्रहरूमा निरन्तर सक्रिय भूमिका निर्वाह गर्दै आएको छ । सोही अभियान अन्तर्गत क्लबले सुन्दरपुर आधारभूत विद्यालयलाई नमूना विद्यालयका रूपमा विकास गर्ने दीर्घकालीन योजना अघि सारेको हो ।
क्लबकी अध्यक्ष पुष्पाञ्जलि ठकुरी सिन्हाका अनुसार विद्यालय सुधारका लागि वहुवर्षीय योजना तयार पारिएको र सो योजना चरणबद्ध रूपमा कार्यान्वयन हुँदै गएको छ । पहिलो चरणमा शिक्षकलाई आधुनिक र व्यवहारिक शिक्षाका विषयमा तालिम प्रदान गरिएको थियोे।
रोटरी क्लब अफ बिर्तामोड मिडटाउनले विद्यालयमा आधुनिक शौचालय निर्माण, खानेपानी ट्यांकी स्थापना र विद्यालय परिसर सरसफाइका काम पनि अघि बढाएको जनाएको छ । क्लबले आगामी चरणमा विद्यालयको भौतिक पूर्वाधार र वातावरणीय सुधारका कार्यक्रम सञ्चालन गर्ने योजना बनाएको छ ।
