बाह्रदशी गाउँपालिकाको बजेट ५० करोड भन्दा माथि
बाह्रदशी गाउँपालकाले आर्थिक वर्ष २०८१÷०८२ का लागि ५० करोड ४५लाख ४४हजार ९ सय ९९रुपैयाँको बजेट सार्वजनिक गरेको छ ।
सोमबार १५औं गाउँसभामा उपाध्यक्ष शान्तादेवी शिवाकोटी खरेलले उक्त आकारको बजेट प्रस्तुत गरेकी हुन् । प्रस्तावित बजेट मध्ये चालु तथा प्रशासनिक खर्चतर्फ ८ करोड ३४ लाख १५ हजार ६ सय रुपैयाँ, पूँजीगत खर्चतर्फ २१ करोड १३ लाख ४३ हजार र सशर्त अनुदानतर्फ .२१ करोड ७७ लाख ४४ हजार ९ सय ९९ रुपैयाँ विनियोजन गरिएको छ ।
गाउँपालिकाले शीर्षक अनुरुप वडा विकासतर्फ ६ करोड १० लाख, संस्थागत तथा क्षमता विकास कार्यक्रमतर्फ ४४ लाख, आर्थिक विकासतर्फ १ करोड ४३ लाख, वन, वातावरण संरक्षण तथा विपद व्यवस्थापनतर्फ १९ लाख, सामाजिक विकासतर्फ ४ करोड ३३ लाख ८७ हजार ३ सय ९९ रुपैयाँ, भौतिक पूर्वाधार विकासतर्फ ७ करोड ३४ लाख २ हजार, संघ र प्रदेशको सशर्त अनुदानतर्फ २१ करोड ७७ लाख ४४ हजार ९ सय ९९ रुपैयाँ , संघ र प्रदेशको समपूरक अनुदानतर्फ १ करोड ५५ लाख छुट्टयाइएको छ भने संघको विशेष अनुदान यो पटक कटौती गरिएको छ ।
समृद्ध बाह्रदशीको आधार, कृषि शिक्षा स्वास्थ्य र पूर्वाधार’ भन्ने मुख्य नारालाई आत्मसात गर्दै आगामी वर्ष बाह्रदशी गाउँपालिकालाई कृषिमा आधुनिकीकरणमार्फत किसानमा खुशी, शिक्षामा गुणस्तर कायम, सबै नागरिकमा स्वास्थ्यको सहज पहुँच, पूर्वाधार निर्माणका कामलाई सबल बनाउँदै गाउँपालिकालाई समृद्धिको गाउँपालिका बनाउने लक्ष्य राखिएको गाउँपालिका अध्यक्ष देवेन्द्रप्रसाद चौलागाईंले जानकारी दिए ।
गाउँपालिकाका प्रमुख प्रशासकीय अधिकृत जनार्दन निरौलाले सभाको सहजीकरण गरेका थिए ।
सभामा सभाका सदस्य गंगाराम धिताल,जय तिम्सिना ,हेमलाल दाहाल,मिलन सङ्ग्रौला,कल्पना श्रेष्ठ,डुका कुमारी बि.क.,युवराज ढकाल,सम्पत लाल गिरिलाइ सभाका अध्यक्ष चम्लागाईले छलफलमा भाग लिन समय प्रदान गर्नुभएको थियो ।
